Ujumbe wa Kwaresima kuhusu Msamaha

      Ndugu zangu, dhambi ni ugonjwa ambao dawa yake na Mganga wake mkuu ni Bwana wetu Yesu Kristo. Kristo ndiye mponyaji wa roho iliyokufa: katika umoja na roho mtakatifu huifufua roho-mfu na kuifanya mpya, takatifu isiyokuwa na doa. Kristo kwa asili hapendi roho batizwa ipotee, bali kila ipoteapo huitafuta kwa upendo, kama vile masikini atafutavyo Dhahabu katika shimo la machimbo.
      
      Huruma ya Mungu hutuvuta kila wakati tunapoanguka katika dhambi. Moyo wa mtu uliovunjika na kuguswa hupata maumivu na kuimba Huruma ya Mungu, Mtu huyo mdhamdi aijongeapo altare ya Huruma ya Mungu kwa dhati na unyenyekevu huchota neema tele na kuhuishwa nafsi yake.


      Tendo la kuomba Huruma ya Mungu huitwa Toba au Msamaha au Upatanisho au Maungamo au Uongofu au Kitubio. Mgonjwa huhisi uchungu na chuki kubwa dhidi ya dhambi alizozifanya kisha huomba msamaha kuanzia katika nafsi yake, kwa jilani yake na kisha kwa Muumba wakee.Tendo hili takatifu hujitokeza kwa namna mbalimbali kama vile kwa njia ya sala, kufunga, kutoa sadaka, kujinyima, kufanya matendo mema, kuacha uchoyo na ubinafsi na kisha kufanya mageuzi ya rohoni. Namna hizi hazifanyiki tuu katika kipindi cha Kwaresima, bali hupaswa kutekelezwa na Mkristo katika maisha yake ya kila siku.
      Roho mtakatifu ni mfanyakazi na mchumba katika roho ya mtu. Huiongoza nafsi na kumsaidia Muungamaji kutafiti dhambi kwa umakini, kufanya majuto kwa masikitiko, kuungama dhambi na kisha kutimiza malipizi.
      Wakristo wenzangu, Sakramenti hii ya kitubio hutupatanisha na Mungu, kanisa, kurudishiwa hali ya neema iliyopotea baada ya kutenda dhambi, kuondolewa adhabu ya milele iliyostahiliwa, twapata amani na utulivu wa dhamili, pamoja na faraja ya roho, na mwisho twapata nguvu za Kiroho kwa mapambano ya Kikristo.
       Mwisho kabisa, tendo hili la mfungo mtukufu wa Kwaresima, hutudai kufanya mambo ya kujinyima kama vile Vileo, burudani, chakula na kadharika. Tufanyapo mambo haya, twaweza kuibadili jamii yetu inayotuzunguka iliyo na matatizo chungu nzima. Mfano mmomonyoko wa maadili hasa kwa vijana, magonjwa mbalimbali, matatizo ya kiuchumi, mabadiliko ya kisiasa, tabia na mienendo pamoja na hali mbaya ya hewa.